Paglutas sa local communist armed conflict suportado ng TESDA

February 22, 2019

Tiniyak ni Technical Education and Skills Development Authority (TESDA) Director General, Secretary Isidro S. Lapeña ang pakikipagtulungan at suporta ng ahensya sa pagpuksa at pagpigil sa local communist armed conflict sa bansa alinsunod sa ipinalabas na Executive Order #70 ni Pangulong Rodrigo Roa Duterte.

Sa ilalim ng EO #70 na nilagdaan noong December 4, 2018 ni Pangulong Duterte, para sa pagbuo ng national peace framework at pagtatag ng “whole-of-nation approach” upang makamit ang “inclusive and sustainable peace” sa bansa na naglalayon na lutasin ang mga ugat ng mga nangyayaring kaguluhan.

Inihayag ito ni Lapeña sa kanyang pagsasalita sa idinaos na National Taskforce to End Local Communist Armed Conflict (NTF-ELAC) meeting na ginanap sa Tandang Sora Hall, TESDA Women Center (TWC) sa Taguig City kung saan host ang kalihim.

Ang agenda ng nasabing pulong ng NTF-ELAC ay “Basic Services/Livelihood and Poverty Alleviation/Infrastructure and Resource Management” na may kaugnayan sa mga hakbangin ng gobyerno upang malutas at masawata ang local communist conflict.

Dumalo din sa nasabing pulong sina National Security Adviser Hermogenes Esperon, Jr., Alabat, Quezon Mayor Fernando L. Mesa, DSWD Undersecretary Rene Glen Paje, TESDA Deputy Director General Gaspar Gayona, at iba pang mga opisyal ng Armed Forces of the Philippines, Philippine National Police, DILG, DENR, DepED, NICA, at marami pang iba.

Binigyan-diin ni Lapeña, napakahalaga ng magiging papel ng TESDA sa paglutas sa mga problema kahirapan, kapayapaan at kaayusan dahil ang ahensiya umano ang gateway ng skills training, employment at livelihood sa adhikaing ito ni Pangulong Duterte sa layunin nito na puksain ang rebelyon sa local level.

“TESDA’s role for this effort is crucial as we are the gateway of training, employment and the livelihood.  Hindi tayo pwedeng makapagbigay ng employment at livelihood kung hindi sila mag-train for this purpose.  That’s why TESDA is here,” ani Lapeña.

Ang pinakamahalaga umano sa “whole-of-nation approach” ay ang makuha ng gobyerno ang isip, puso at tiwala ng lahat ng mga mamayan sa pamamagitan ng paghahatid ng tunay na serbisyo gaya ng trabaho, social development packages, kabilang ang edukasyon, kasanayan, housing at healthcare, magandang pamumuhay para sa lahat lalo na yaong mga mula sa pinakamahirap na mamamayan ng lipunan.

“Let these basic services delivered by us to them, sa ating mga kababayan who have less in life,” ani Lapeña.

Aniya, ang pagtugon sa nasabing problema ay hindi sa pamamagitan ng pagpuksa sa kanila kundi sa pamamagitan nang pagkuha kanilang tiwala sa gobyerno.

Kailangan din umanong tugunan ang mga ugat ng problema gaya ng kahirapan, kamangmangan, kawalan ng katarungan, korupsiyon, unemployment at iba pa.

Kaya mahalaga ayon kay Lapeña, na kailangan i-prioritize at agarang paghahatid ng mga basic services at social development pacakages, kasama ang edukasyon, kasanayan, housing, at healthcare at iba pa.

Sa panig umano ng TESDA, nagsimula na itong magpatupad ng mga intervention sa pamamagitan ng pagbibigay ng mga skills training sa mga mahihirap, special clients, gaya ng mga rebel returnees, indigenous peoples (IPs), drug surrenderers, mga preso at kanilang pamilya, at marami pang iba.

Sa pagtapos ng 2018, ang TESDA ay nakapagsanay ng may 972 rebel returnees, 26,266 IPs, at drug surrenderers, 20,716. Tinatayang 3,000 sa mga graduates ay nakakuha ng trabaho o nagkaroon ng livelihood.

“Let us work together and collaborate to win the hearts of the people,” pagtatapos nito.

Samantala, si Esperon ay nagbigay naman ng ulat kaugnay sa isinasagawa hakbang at programa ng gobyerno para sa paglutas ng rebelyon sa local level.

Binanggit din nito na na 35% ng populasyon, kasama ang mula sa mga IPs, katutubo ay nagiging warriors ng New People’s Army – National Democratic Front (NPA-NDP) sa pagrerebelyon laban sa nakaupong gobyerno.

Tinukoy din nito na karamihan sa mga rebelde ay nagmumula sa mga labor groups at universities.

Sa panig ni Mayor Mesa, iprinesenta nito ng mga ipinatutupad nitong mga programa at aktibidades sa kanyang mga mamayan kaya na deklara ang Alabat na “communist free”.