January 20, 2019
Buo nang matatanggap ng mga technical-vocational students na nasa ilalim ng Dual Training System (DTS) ang kanilang daily allowance mula sa industriya kung saan sila nagsasanay habang nag-aaral.
Ang allowance na ito ay katumbas ng 75% ng prevailing minimum wage.
Ito ang nakapaloob sa binagong Implementing Rules and Regulations (IRR) ng DTS na inaprubahan kamakailan ng Technical Education and Skills Development Authority (TESDA) Board na pinamumunuan ni Secretary Isidro S. Lapeña.
Ipinaliwanag ni Lapeña na sa ilalim ng dating DTS IRR, mula sa allowance na dapat na natatanggap ng mga estudyante mula sa industriya, 30% lamang ang ibinibigay ng institusyon at ang 70% nito ay napupunta sa kanilang operational expenses.
“Ngayon hindi na. Pagbigay ng establishment ng allowance, direct nang ibibigay ng school ‘yon nang buo sa estudyante,” ani Lapeña.
Ayon kay Lapeña, ang pangunahing layunin sa pagrebisa o pagbabago sa DTS IRR ay upang makahikayat ng maraming industriya na lumahok sa DTS at para iangkop sa kasalukuyang mga pagbabago ang mga probisyong nakapaloob sa DTS IRR.
“Dahil 25 years na ang DTS, may mga probisyon na hindi na nababagay sa kasalukuyang panahon. Kaya binago natin ito upang maging relevant, naaangkop, at para marami tayong mahikayat na lumahok (na mga employers) sa DTS,” paliwanag ni Lapeña.
Sa pamamagitan nito, mapapalakas ang ‘employability’ ng mga tech-voc graduates at makakatulong na makahanap sila agad ng akmang trabaho at livelihood opportunities pagka-graduate.
Ang DTS Law (RA 7686) ay nilagdaan bilang batas noong 1994 ni dating Pangulong Fidel V. Ramos.
Sa ilalim ng training modality ng DTS, magtutulungan ang paaralan at kumpanya sa pagsasanay ng mga tech-voc trainees. Ang theoretical training ay matututunan sa mga schools samantalang ang practical training ay mararanasan sa mga kumpanya.
Sa kasalukuyan, umaabot na sa 100 institutions ang nagpapatupad ng DTS na may mga 300 partner companies sa buong bansa.
Kabilang sa binago ay ang mga sumusunod:
Ang number of training hours sa DTS ay ginawang ‘adjustable’ alinsunod sa mapagkakasunduan ng institusyon at kumpanya. Sa ilalim ng dating IRR, 40% ng panahon ay sa iskul ginaganap at ang 60% ay sa kumpanya. Sa ngayon, maari nang may iba pang training hour arrangement na papabor sa kumpanya kung nais pa nitong magdagdag ng training hours para sa trainee.
Ipinagbawal na ang “graveyard shift” para sa mga trainee. Ang takdang normal daily training hours (8 hours) ay magsisimula alin mang oras sa pagitan ng ika-6 ng umaga hanggang ika-10 ng gabi. Ito’y bunsod umano sa mga natatanggap na reklamo ng ahensiya mula sa mga mag-aaral na may ilang kumpanya na nagsasagawa ng training sa gabi.
Pasok na ang DTS sa scholarship program ng TESDA.
Sa paghahanda sa training plan ng DTS, kasama sa pagbuo at kokonsultahin ang institusyon, kompanya at ang labor union ng huli. Upang hindi maabuso ang naaprubahang training plan na isusumite ng institusyon, kailangang naka-attach ang listahan ng mga estudyante na gagamit nito.
Ibinukas ang DTS accreditation sa lahat ng technical vocational institutions (TVIs) na may TESDA-registered program.
“Lahat ng TVIs na may registered program ay maaari nang mag-apply ng DTS accreditation,” paliwanag ng Chief ng Partnerships and Linkages Office ng TESDA, Floramel Joy Songsong.
Ang mga kumpanya ay inaatasang magbigay ng kanilang certificate of dual training para sa mga trainees ‘di tulad ng dati na ang institusyon lamang ang nagbibigay nito.
Isasailalim sa taunang TESDA compliance audit ang mga institusyon na nagpapatupad ng DTS.
Napapanahon din ang nasabing pagbabago upang ang pagpapatupad ng mga scholarship programs ng ahensiya ay maiayon sa direksyon na gustong pairalin ni Secretary Lapeña.
Simula nang maupo ang TESDA head, iginigiit nito na sa pagpapatupad ng mga scholarship programs, hindi lamang umano dapat na nakapokus ang ahensiya sa pagbibigay ng kasanayan, kundi ang pagtiyak ng agarang pagkakaroon ng trabaho ng mga trainees matapos na grumadweyt.
Aniya, “Medyo mahirap at mangangailangan ito nang ‘extra effort’ pero ang ating iniisip ay kung paano tayo makakatulong sa mga kababayan nating mga mahihirap.”
Dahil magkatuwang ang kumpanya at institusyon sa pagbibigay ng kasanayan sa mga trainees, malaki ang tsansa na makuhang empleyado ang mga graduates ng mga naka-partner na kumpanya kung saan sila nag-training.
“Ang assumption, dahil ang industriya ang nagsabi na ganito ang kailangan na pagdaanan ng trainees, kapag natapos nila ang training, mas akma ang natutunan nila sa pangangailangan ng industriya, kaya malaki ang posibilidad na maeempleyo sila,” ayon kay Lapeña.
Bunsod nito mabibigyan ng mataas na pagkakataon na makapagtrabaho ang mga tech-voc trainees dahil mababawasan ang job mismatch.
Share this page
