December 16, 2018
Suportado ni Technical Education and Skills Development Authority (TESDA) Director General, Secretary Isidro S. Lapeña, na buhayin at bigyan ng kapangyarihan ang mga Community Training and Employment Coordinators (CTECs) sa bansa.
Ipinarating ito ni Secretary Lapeña sa kanyang pagdalo bilang guest speaker sa 3-day CTECs Congress na ginanap sa Grand Regal Hotel sa Davao City nitong Disyembre 10-14, 2018 na may temang “Gearing Towards Vibrant and Inclusive Technical Vocational Education and Training”.
Sa kanyang talumpati, sinabi ni Lapeña na mahalaga ang pag-uugnayan ng TESDA at LGUs upang matiyak na maiparating sa komunidad, lalung-lalo na sa pinakamahirap na grupo ng mga mamayan, ang ginagawa ng ahensiya.
Ang naging pangunahing layunin ng pulong ay ang pag-validate sa bagong likhang Competency Standards para sa mga CTEC at pagkalap ng mga inputs sa paglikha ng competency assessment tools para sa mga standards na ito.
Nilikha noong panahon pa ng National Manpower and Youth Council (NMYC), ang mga CTEC ay mga emplayado ng local government unit (LGU) na pinagkakatiwalaan sa planning, coordinating at evaluating ng mga tech-voc programs sa kanilang lokalidad.
Aniya, malaking tulong ang mga CTEC upang ang mga programa ng ahensiya ay maging mas epektibo at pangmatagalan, kaya mahalaga na ang mga LGUs at ang kanilang mga CTEC ay kasama at kuwalipikado sa pagplano, at pag-organisa at pagsubaybay sa training at employment programs.
Umaasa ang TESDA chief na maaayos nila ang matagal nang hangarin ng CTECs na magkaroon ng plantilla position o magkatanggap man lang sila ng mga kaukulang insentibo.
“I encourage every LGU to designate CTECs nationwide, and TESDA to provide support and assistance. We hope to work in addressing the long-desire of CTECs to have plantilla positions, or at least device an incentive system for them. I know this is hard, but nothing is impossible,” ani Lapeña.
Ipinangako ni Lapeña na bumuo at magpapatupad ng mga nauukol na plano sa pagpapaunlad ng mga kakayahan ng LGUs upang sila na ang gaganap sa mga responsibilidad sa pagbibigay ng community-based technical education at skills development opportunities.
Bunsod nito, sinabi ni Lapeña na isusulong ng TESDA ang pagtatag ng mga technical education and skills development (TESD) committees sa local level na magko-coordinate at mag-monitor sa paghahatid ng mga skills development activities na ipatutupad ng gobyerno at pribadong sector.
Sa kasalukuyan ang mga aktibong TESD committees ay nasa mga lalawigan ng Bukidnon, Cebu at Davao del Norte.
Sa joint TESDA-DILG Memorandum Circular 2003-174, na may petsang 25 August 2003, nakasaad dito na ang CTECs ay regular na LGU personnel na sinanay ng TESDA para magplano, mag-organisa at magsubaybay sa mga community-based training at enterprise development program ng LGU.
Sinabi ng opisyal na makikipagtulungan ang TESDA sa DILG upang muling pag-aralan ang nasabing circular upang maiangkop sa mga pangangailangan sa kasalukuyan.
“Through this, the LGU can design and earmark funds for their own training programs that will be responsive to the peculiar needs of the community, and TESDA will provide the technical assistance needed,” ani Lapeña
Binigyan-diin nito na ang gawain ng CTECs ay bahagi ng kanyang “community-driven economics” para sa pagiging “people-oriented” ang TVET.
Share this page
