Dual Training System palalawakin ng TESDA

October 21, 2018

Palalawakin at pasisiglahin ng Technical Education and Skills Development Program (TESDA) ang implementasyon ng Dual Training Systems and Dualized Training Programs (DTS/DTP) para sa technical-vocational education training (TVET) sa bansa.

Ang programa ay kasama sa mga tatalakayin sa idaraos na “Industry Forum on DTS Implementation” kasabay sa pagdiriwang ng DTS Week ng ahensya na gaganapin sa Hotel Jen sa Pasay City sa darating na Oktubre 24, 2018. Ito ay may temang “DTS Talaga ang Swak”.

Ang DTS Week ay taunang ipinagdiriwang ng TESDA upang bigyan ng pagkilala ang mahalagang kontribusyon ng mga public at private technical vocational institutions (TVIs) at mga katuwang na industriya sa pagpapatupad ng DTS na epektibong sistema sa paghubog ng mga manggagawang Filipino.

“Layunin ng pulong na bumuo ng mga pamamaraan upang hikayatin ang paglahok ng mga industriya, at talakayin ang mga inisyatibo na maaring magpalawak sa pagtugon ng mga stakeholders sa implementasyon ng DTS,” ayon kay TESDA Deputy Director General for Partnerships and Linkages Rebecca J. Calzado.

“Layunin din nito ang palakasin ang kooperasyon ng mga stakeholders sa pagpapatupad ng DTS bilang ‘training delivery mode’ sa paghubog ng mga susunod na manggagawang Filipino at paghimok para sa malawakang partisipasyon ng mga industriya sa pagpapatupad nito,” dagdag ni Calzado.

Pagtugon ito ng ahensya sa nalathalang policy paper ng World Bank (WB) na may titulong “Who Benefits from Dual Training Systems Evidence from the Philippines” na kung saan binanggit nina Takiko Igarashi, WB Education Specialist, author ng artikulo at Dr. Pablo Ariel Acosta, Ph.D, WB Senior Economist, na ang DTS delivery system ay magbubukas ng maraming pagkakataon para sa mga kabataang Filipino, partikular sa mga nahirapan sa kanilang academic subject sa basic education.

Ayon pa sa nasabing pag-aaral, ang praktikal na pagsasanay na naibibigay ng DTS ay pangunahing tugon upang bawasan ang youth unemployment sa Pilipinas, partikular sa mga nag-graduate sa vocational training o high school at lulutas sa skills gap problem.

Kasama sa mga inanyayahan ay mga tagapagsalita mula sa Philippine Chamber of Commerce and Industry (PCCI).

Ang DTS ay hango sa sistema ng Germany kung saan ang pag-aaral ay ginagawa sa dalawang lugar, sa eskuwelahan at sa kompanya.

Sa ilalim ng DTS, ang eskuwelahan at kompanya ay magkakatuwang sa paghubog sa kasanayan ng isang trainee at sa paggawa ng curriculum at plans na aangkop sa pangangailanan ng kompanya. 40% ang itinuturo sa eskuwelahan o in-school training at 60% sa kompanya o in-plant training.

Ang Republic Act 7686 (Dual Training System Act of 1994) ay nilagdaan bilang batas noong Pebrero 25, 1994 ni Pangulong Fidel V. Ramos para sa pagpapatupad ng Dual Training System bilang instructional delivery system para sa mga TVET trainees.

Upang higit na mapalawak at mapalakas ang enterprise-based training programs, nagpalabas ang TESDA ng implementing guidelines sa pagpapatupad ng Dual Training Systems at Dual Training Programs noong Oktubre 18, 2012.

Sa kasalukuyan, mayroong 110 TVIs na nagpapatupad ng DTS/DTP sa buong bansa kung saan ang may pinakamataas na bilang ay nasa Region lll, 56; Region lV-A, 21; at Region IX, 9.

Samantala, mayroon namang 876 DTS/DTP Industry partners sa buong bansa, kung saan nangunguna ang Region lll, 186; Region X,160; National Capital Region (NCR), 147 at Region ll na may 132 industry partners.

Ang limang 5 kuwalipikasyon na may pinakamataas na bilang ng mga kompanya na nagpapatupad ng DTS/DTP ay Tourism, 316; Electrical and Electronics, 233; Metals and Engineering, 89; Automotive and Land Transportation, 68; Agriculture, Forestry and Fishery, 40.

Simula noong 2013 hanggang Enero-Setyembre 2018, umaabot sa 88,947 ang kabuuang enrollees sa DTS/DTP at 72,607 naman ang naka-graduate.

Tampok din sa nasabing forum ang paglulunsad ng “National Recognition for Exemplary Implementation of Dual Training System (DTS)”.

Sa nasabing programa, magkakaroon rin ng presentasyon ang Punlaan School sa San Juan City na pioneer sa pagpapatupad ng DTS German Model para sa kursong Hotel and Restaurant Industry na nagsimula noong 1993. May mga presentasyon din na manggagaling sa St. Peregrine Institute ng Bacoor, Cavite, at sa Dualtech Training Center sa Laguna na DTS pioneer na nagsimula pa noong 1982 sa kursong Electromechanics.

Inaasahang dadalo ang mga kinatawan ng TVI, industry at DTS focal persons sa Region lll, lV-A at NCR (DTS at non-DTS implementers), mga kaugnay na ahensya ng gobyerno, at iba pang stakeholders.