MENU

Issue ng ghost scholars 2015 pa nangyari, bago kay Mamondiong


August 23, 2018

Nilinaw ng pamunuan ng Technical Education and  Skills Development Authority  (TESDA)  na hindi nangyari sa kasalukuyang administrasyon ang napaulat na doubtful scholars o ghost scholars na umano’y  pinondohan ng ahensya.

 Ang paglilinaw ay ginawa ni TESDA Director General, Secretary Guiling “Gene” A. Mamondiong kaugnay sa inilabas na ulat ng Commission on Audit (COA) na ang TESDA ay nagbayad ng P9.3 milyon para sa JAVA training at Software Development NC IV para sa 310 scholar at P1.47 milyon para sanayin ang 270 scholar sa kursong Barista NC ll at Bartending NC ll sa kabila na  ang eskuwelahan at listahan ng mga trainees ay hindi nag-e-exist.

Pinangalanan ng COA ang Ama Computer College (AMACC) Manila Campus   at Tech-nivoc Institute Corporation (TIC) na kabilang sa mga eskuwelahan na nadiskubreng may iregularidad.

“Ito ay nangyari noong 2015 at nadiskubre noong 2016.  Ang pera ay naibalik na sa National Treasury,” pahayag ni Mamondiong.

Inamin ni Mamondiong na may mga ghost scholars at training schools na patunay umano sa ginawang pagsasauli ng pera ng AMACC, Sta. Mesa Campus.

Gayunpaman, sinabi ni Mamondiong na gumagawa na sila ng mga kaukulang hakbang  para maiwasan ang anumang katiwalian at kurapsiyon sa ahensya.

 Aniya, bago pa siya maupo bilang bagong TESDA chief  noong 2016 ay may naririnig na ito tungkol sa mga nagaganap na katiwalian sa ahensya gaya ng mga  ghost scholars at training centers sa buong bansa.

Kaya nang maupo  siya bilang bagong TESDA chief, agad  niyang binuo ang Technical Audit Team na naglibot sa 4,283 schools sa buong bansa  na may registered programs sa TESDA  upang masiguro na ang mga ito ay sumusunod sa regulasyon ng TESDA at para na rin masuri kung may sapat silang kagamitan para sa pagpapatakbo ng mga technical-vocational (tech-voc) training programs. Ayon sa resulta ng isinagawang national technical audit at inspection, 175 na training centers at 6,273 na programa ang ipinasara

Kausunod nito, binuo rin  ang National Inspectorate for  Scholarship Program (NISP) na siyang magsagawa nang national inspection at spot checks sa lahat ng training centers  sa buong bansa na binigyan ng  scholarship slots ng TESDA upang siguraduhin na walang nag- e-exist na ghost scholars  at  talagang nagsasagawa ng aktuwal na pagsasanay ang mga eskuwelahan.

Sa kasalukuyan ay pinag-aaralan na nito ang resulta  ng mga isinagawang inspection at inaasahang ilalabas nito sa lalong madaling panahon.

Kasabay nito, sinabi ni Mamondiong na noong August 30, 2017 ay idineklara nito sa harap mismo ni Pangulong Rodrigo Duterte na corruption free’ ang ahensya.

Nag-alok din umano siya ng P50,000 pabuya sa sinumang mag rereport sa kanya kaugnay sa nagaganap na katiwalian  sa ahensya na hanggang ngayon ay nag-aantay pa ng magsusumite ng report tungkol sa katiwalian na may sapat na ebidensiya .

Ang inspeksyon ay isinagawa  simula 2017 hanggang Pebrero 2018.

Ipinagtanggol naman nito ang nakaraang administrasyon, sa pagsasabi na hindi sistema o kultura sa loob ng TESDA ang nangyaring katiwalian, kundi nagkataon lamang ito. 




Back to List